عرض أول مشاركة غير مقروءة

Admin المساهمات : 144 تاريخ التسجيل : 09/06/2011

الفطير المشلتت من مطبخى بالصور
السلام عليكم
النهرده عملت فطير مشلتت
وقلت لازم انزله
بصو ياجماعة صلو ع النبى
انا حطيت حوالى 7 كوبايات دقيق صغيرين
مصورالكم الكوباية
وهنحط المية شوية شوية بالراحة اوى
وكل مانحط شوية ميه نعجن
لغاية ماالعجينة تبقى كورة
عجينة الفطير طرية بس مش اوى
لازم تكون عرقانة يعنى عاملة زى الحاجة الملصقة وانتى بتمسكيها
بس فى نفس الوقت مش لدرجة انها تلصق فى ايدك ومتطلعش
الفطير يعنى عجينة
ان العجينة كويسة كل شىء هيمشى تمام
بعد ماتبقى كورة تمسكى العجينة فى ايدك وتفضلى تدعكى فيها بتاع ربع ساعة
ده بيدى نتيجة كويسة بعد كده
بعد كده تسيبى العجينة ترتاح حوالى ساعة
طبعا بره مش فى التلاجة
بعد كده نيجى للفرد
هتدهنى الترابيزة زبدة او زيت
وتفردى العجينة الاول بالنشابة عشان تساعدك شوية
لما تحسى انها اتفردت معاكى هتشديها بايدك بس بالراحة خالص عشان متتقطعش
وممكن تعمليها كلها بالنشابة ان حبيتى ومتستعمليش ايدك
بس اهم حاجة تتفرد لغاية ماتبقى شفافة ومبينة اللى تحتها
هتجيبى السمنة
وتغطى العجينة كلها
انا عن نفسى بستخدم سمنة بدرجة حرارة المطبخ مش سايحة
بعد كده هتطبقى جزء وتدهنيه سمنة
هتطبقى جزء تانى وتدهنيه سمنة
كل ماتطبقى جزء منها تدهنيه
لغاية ماالعجينة تخلص وتبقى مربع
هتدهنى صينية متوسطة زبدة
وهتفردى فيها العجينة بايدك
لغاية ماتحسى انها اتساوت فى الصينية
بعد كده هتحطى ع وشها قشطة
لأنها بتطرى العجينة وتديها لمعة
وتدخليها الفرن ع درجة متوسطة
وهتحطى فوق النار صينية فيها ميه
ده بيدى طراوة للعجينة
وهى فى نص سواها هتلاقيها اتنفشت معناها ان فطيرتك ناجحة ان شاء الله
لما تلاقى وشها احمر واستوت هتطلعيها من الفرن
واول ماتطلعيها غطيها بطبق او حطيها فى كيس عشان متنشفش
معلش طولت عليكو
دلوقتى هسيبكم مع الصور بالتفصيل
واى استفسار انا تحت امركم

عرض أول مشاركة غير مقروءة 13076571783629

عرض أول مشاركة غير مقروءة 13076572607017

عرض أول مشاركة غير مقروءة 13076573518538

عرض أول مشاركة غير مقروءة 13076574556577

عرض أول مشاركة غير مقروءة 13076575476448

عرض أول مشاركة غير مقروءة 13076576225192

عرض أول مشاركة غير مقروءة 13076577079868

ان عجبكم الموضوع متنسوش التقييم ياقمرات